البحث عن التبن

ديه صورتي قبل 25 يناير...وبرغم كل شيء واي قرف الواحد كان شايفه ...كان فاكر ان مفيش حال احسن من كده وان الدنيا امان ومستقرة ...زي حمار حصاوي وهو بياكل التبن متخيل ان كده احسن حال والامور تمام ...مضحوك عليه و مش فاهم انه حمار

ومن 25 يناير قام ناس فاهمه ومش قادرة تتحمل الظلم اكتر من كده ونسيوا الخوف وقالو طظ في اي حاجه ....المهم اننا نرجع نوقف تاني ونبقي بني ادمين والكرامة فوق كل شيء....ووقفو قدام الظلم بدون اي خوف او تردد

وطبعا علشان كنت غرقان في التبن او بمعني اصح بدور علي التبن ومشغول اني القيه....وقفت وقلت لاااا  كله الا الاستقرار والناس ديه خونه و فيه مؤامرات علي البلد عايزها تولع والاخوان هيعملوها زي افغانستان والسودان والصومال ....وكنت من اشد المعارضين للثورة وللابطال 25 يناير.

بس يمكن ربنا كريم اوي وبيفتح نظرنا وبيوهبنا الحكمة والفهم من عنده....بدء الحمار يفهم ويفكه من البحث عن التبن ....بدء الخوف يتلاشي ويحل محله التركيز شويه في اللي كان بيحصل وانه ازاي مضحوك عليه وشاف صورته في المرايا وهو بياكل التبن  واكتشف انه حمار حصاوي.

بعد ما شاف شجاعة الابطال قرر انه مايبقاش حصاوي تاني.